بیک ڈور بھرتیوں کے حوالے سے منسوخی کا عمل شروع ہو گیا

دہرادون۔ اب اتراکھنڈ قانون ساز اسمبلی میں بیک ڈور بھرتیوں کو منسوخ کرنے کا عمل شروع ہو گیا ہے۔ جس کے تحت اسمبلی ملازمین کے برطرفی کے لیٹر مسلسل جاری کیے جا رہے ہیں جبکہ ہٹائے گئے سیکرٹری کے بعد نئے سیکرٹری کی تقرری کا عمل بھی شروع کر دیا گیا ہے۔ اتراکھنڈ قانون ساز اسمبلی میں غیر قانونی تقرریوں سے متعلق انکوائری کمیٹی کی رپورٹ آنے کے بعد اسپیکر کی جانب سے برطرفی کی کارروائی شروع کردی گئی ہے۔ ملازمین کو گزشتہ روز 40 برطرفی کے لیٹر دیے گئے اور آج بھی مزید 100 ملازمین کو برطرفی کے لیٹر جاری کیے جا رہے ہیں۔
سپیکر نے کہا کہ برطرفی کے عمل میں کچھ وقت لگتا ہے لیکن یہ کارروائی آنے والے دنوں میں بھی جاری رہے گی۔ اسمبلی سپیکر ریتو کھنڈوری نے کہا کہ کمیٹی کی انکوائری رپورٹ میں اس بات کی تصدیق ہو گئی ہے کہ جن ملازمین کی برطرفی کی جا رہی ہے ان کی تقرریاں غیر قانونی تھیں۔ اسمبلی اسپیکر ریتو کھنڈوری نے کہا کہ ان دنوں اسمبلی میں ہنگامہ ہے اور ابھی تک اسمبلی میں کوئی سکریٹری نہیں ہے۔ اس لیے اسمبلی سکریٹری کے عہدے کے ذمہ دار شخص کی تلاش کی جارہی ہے۔ تاکہ اسمبلی کو موثر انداز میں چلایا جا سکے۔ اس لیے امید ہے جلد انتظامات کر لیے جائیں گے۔